நெற்றிக் கண் (நம்பாதீங்க - பகுதி 7)

இறைவனின் இருப்பைப் பற்றிய விவாதங்களும் சர்ச்சைகளும் இன்னும் தீர்ந்த பாடில்லை. இறைவனை நம்புபவர்கள் அதற்காக பல விவாதங்களை முன்வைக்கிறனர். நாத்திகர்களும் அதற்கு இணையான விளக்கங்களின் மூலம் மறுக்கிறனர்.

நாசாவின் ஒரு புகைப்படத்தை வைத்து பலர் கடவுளைக் காட்டிய கதை இது:

படத்தில் இருக்கும் பொருள் கண் போலவே தோன்றுகிறது அல்லவா?

இந்த படம் பலருக்கு இறைவனைக் காட்டியது. அதைப் பற்றிய  செய்தி (தமிழாக்கம்): 

கடவுள் இருக்கிறார்!!
கடவுள் உண்டா இல்லையா என்பது இன்று வரை சர்ச்சையாக இருக்கிறது.. ஆனால், நாசா எடுத்த ஒரு புகைப்படம் மூலமாக கடவுள் இருப்பது உறுதியாகி விட்டது!!
இது நாசாவின் ஹப்பிள் தொலை நோக்கி எடுத்த அரிய படம். இது 3000 வருடங்களுக்கு ஒரு முறையே நடக்கும் என்று நாசா அறிவித்துள்ளது! இது "கடவுளின் கண்" என்றழைக்கப்படுகிறது..
இதை எளிதாக அஞ்சல் பெட்டியில் இருந்து அழிக்கலாம்.. ஆனால், அதை விட எளிதாக பரப்பலாம்.. கடவுள் நம்மையெல்லாம் பார்த்து கொண்டு இருக்கிறார்!

உண்மை இது தான்

         இந்த படம் நாசாவால் எடுக்கப்பட்டது தான்!! இந்தப் படம் மே 10, 2003 அன்று நாசாவின் "சிறந்த விண்வெளி படம்"  ஆகத் தேர்வு செய்யப்பட்டது.

ஹப்பிள் தொலைநோக்கி மற்றும் அரிசோனாவில் உள்ள கிட் பீக் தேசிய வானோக்குநிலையம் (Kitt Peak National Observatory) ஆகியவற்றில் எடுக்கப்பட்ட படங்களின் கலவை தான் மேலே கண்ட படம்.

ஆனால்.... மற்றவை அனைத்தும் தவறு

இந்த காட்சி 3000 ஆண்டுகளுக்கு ஒரு முறை நிகழக் கூடியது அல்ல. என்றும் இதனைக் காணலாம்!

இது நம் சூரிய மண்டலத்திற்கு மிக அருகில் இருக்கும் சுருளை வான்புகையுரு (Helix Nebula) ஆகும். 

சுருளை வான்புகையுரு ஒரு கோள் விண்மீன் படலம் (Planetary Nebula- நட்சத்திரம் அழியும் போது உருவாகும் வான்புகையுரு) வகையைச் சேர்ந்தது. இது நம் பூமியில் இருந்து சுமார் 650 ஒளி ஆண்டுகள் தொலைவில் உள்ளது.

சுருளை வான்புகையுரு பற்றி மேலும் தகவல்களுக்கு : விக்கிபீடியா



'நம்பாதீங்க' தொடரின் அனைத்து பகுதிகளையும் படிக்க: நம்பாதீங்க

முந்தைய பகுதி: பிராட் ஹாக் வாங்கிய சச்சினின் கையெழுத்து